Nga Bisan Nakabuhat Ug Milagro Dili Gihapon Maluwas

Adunay uban nga mga relihiyon, ang ilang gigamit nga pangdani sa mga tawo aron mopamyembro diha kanila mao ang ila kunong nabuhat nga mga milagro sa ngalan ni Cristo. Matud sa mga lider sa ing-ani nga mga relihiyon, usa kuno nga pamatuod nga tinuod nga relihiyon ang ilang giwali mao ang mga milagro nga ilang nahimo. Kay kung dili pa kuno kang Cristo ang ilang relihiyon, dili kuno sila makahimo ug milagro sa ngalan ni Cristo.

Ambot ug nakahibalo ba sila nga bisan ang yawa makabuhat man usab ug milagro gamit ang ngalan ni Cristo. Himuon kini ni Satanas aron malinlang o mailad ang mga tawo ug madani sila sa pagpasakop sa relihiyon nga sayop. Nakahinumdom ba mo, nga niadtong gitintal sa yawa si Cristo nga mabasa sa Mateo 4:1-11, ang yawa migamit ug mga versikulo sa Biblia. Kini kamatuoran nga ang yawa mogamit ug mga pulong sa Dios aron ilaron ang ilang gustong ilaron. Busa dili usab imposible nga ang yawa mogamit ug milagro sa ngalan ni Cristo aron ilaron ang mga tawo.

Mao gani nga si Cristo nagpasidaan nga adunay mga tawo nga mituo ni Cristo ug nakabuhat ug mga milagro apan dili gihapon sila mamaluwas sa adlaw sa paghukom.

Busa, susiha ninyo ang inyong gipasakopang relihiyon basin ug usa ni sa mga relihiyong Kristiano nga gigamit sa yawa aron mailad ang mga tawo nga mopasakop dinhi aron sila usab mangalaglag sa adlaw sa paghukom

Mao kini ang nakasulat sa Biblia:

Daghan ang magaingon kanako niadtong adlawa: Ginoo, Ginoo, wala ba kami magpanagna tungod sa imong ngalan, ug tungod sa imong ngalan ginahinginlan namo ang mga yawa, ug tungod sa imong ngalan ginabuhat namo ang dahang mga katingalahan? Ug unya pagasaysayan ko sila: Wala ko gayud kamo maila; pahalayo kamo kanako, mga mamumuhat sa kadautan. (Mateo 7:22-23)

Nga Dili Tanan Mituo Ni Cristo Mamaluwas

Matud sa uban, labi na ang mga Born Again Christians ug uban pang mga Protestante, igo ra kuno nga motuo kita ni Cristo para kita luwason ni Cristo. Pero nganong dili man kana maoy gitudlo sa Biblia?

Gani, matud ni Cristo sa Mateo 7:21, "dili tanan ang tanan nga nagaingon kanako: Ginoo, Ginoo; makasulod sa gingharian sa langit..." Ang mga tawo nga mitawag kang Cristo nga Ginoo, sigurado nga magtutuo sila ni Cristo. Pero unsay giingon ni Cristo? Dili kuno ang tanan nga nagatawag niya nga Ginoo, mamaluwas, nga kung sa laing pagkasulti, dili ang tanan nga mituo ni Cristo mamaluwas.

Kini nga kamatuoran nga gisulti ni Cristo, usa ka direkta nga pakontra sa mga gituohan sa kadaghanan nga mamaluwas ang tawo kung motuo lamang siya kang Cristo.

Mao nga kung naay tawo, labi na kung siya pastor, magtudlo siya ninyo nga igo ra ang pagtuo kang Cristo para maluwas, ayaw ug tuo niya kay kana nga pastor o magtutudlo usa siya sa mga bakakong magtutudlo.